Құдайбергенова Бақтыбала Жексенбековна,
Педагог-психолог, Т.Әубәкіров атындағы негізгі мектебі, Тұрар Рысқұлов ауданы, Жамбыл облысы
Тренингтің мақсаты:
Білімділік: Оқушыларға жақсылыққа жетелейтін жақсы қасиеттермен әрбір жақсы істердің шапағаты туралы түсінік беру. Жақсылықты сезіп бағалай білуге үйрету.
Дамытушылық: Оқушылардың қоршаған ортаға, айналасындағы адамдарға мейірімді қатынас жасай алу және жақсылықты түсіне білу дағдыларын қалыптастыру.
Тәрбиелік: Оқушыларды сүйіспеншілікке, сезімталдыққа, сыпайылыққа, қайырымдылыққа, қамқоршы бола білуге, табиғатты сүюге тәрбиелеу.
Тренингтің көрнекіліктері: Қанатты сөздер, жақсылық ағашы, қима әріптер, түрлі-түсті шарлар.
Түрі: Тренинг сабақ
Әдісі: Сұрақ-жауап, пікірталас.
Тренингтің барысы:
Ұйымдастыру кезеңі:
Шаттық шеңбері
Қане, қане тұрайық, үлкен шеңбер құрайық.
Олай болса балалар, мен сіздерді шаттық шеңберіне ортаға шақырамын. Осы шеңбер аясында тұрып, қол ұстасып бір-біріміздің жүрек жылуымызды сезініп, бір-бірімізге жақсы тілектер тілейік.
Жарайсыңдар балалар! Бір-бірімізге жүректегі ыстық тілегімізді тіледік.
Тақпақ:
Жақсы мінез, жылы сөз – жан дәруі,
Адамның керек мұны аңғаруы.
Бейпіл сөйлеп, тік мінез танытқаны
Тіптен оңай адасып, сандалуы.
Мінездер бар жақсы-жаман, әр алуан
Әдептілік әділдіктен нәр алған
Кең болғанның кем болғанын көрмедім,
Теңізге ұқсап тасып жатқан шараңнан.
Жақсылық көрсең біреуден
Мен қандаймын деп ойла.
Жамандық көрсең біреуден,
Мен қандаймын деп ойла!
Ой толғау:
Ал, балалар, сендердің бойларыңда қандай жақсы қасиеттер бар?
Өз бойымызда жақсы қасиеттерге қайшы келетін қасиеттер болса көзімізді жұмып іштей жою жолдарын іздестірейік.
«Таңдап ал» ойыны
Әр оқушы өзіне ұнаған түстегі нөмірленген шарды алып сұраққа жауап береді
1. Жақсы адам болу деген не?
2. Жақсы іс адамның қандай іс-әрекеттерінен байқалады?
3. Жақсылық жасау адамдарды қандай қуанышқа бөлейді?
4. Жақсылық жасау үшін адам бойында қандай қасиеттер болу керек?
5. Айналадағы адамдардың жақсылығын қалай сезінесің?
Шығармашылық жұмыс: «Жақсылық ағашын отырғызу»
Балаларға дайындалған алма үлгісінде қиылған қағаздар беріледі. Әрбір оқушы өздері жасаған жақсы игі істерін жазып бұтақтарына жапсырады.
Міне балалар, сендердің жасаған тамшыдай ғана жақсылықтарың үлкен ағаштың өсіп шығуына жеміс беруіне үлес қосты. Яғни, әр адамның жаны жақсылыққа толы болса жер бетінде бейбітшілік орнап адамдардың бәрі бақытты болады.
Сергіту сәті: «Ну ормандағы жаңбыр» ойыны
Кәне бәріміз тізбектеле тұрайық. Көзімізді жұмып, өзмізді табиғат аясында тұрғандай сезінейік. Күн тамаша ашық, күн сәулесі шуақ шашып тұр, айнала тамаша көрініске толы. Енді көзімізді ашып, өзімізді еркін сезінейік. Алғашқыда бәрі жақсы болып тұрды да кенет, аяқ астынан жеңіл жел соқты, алдыңызда тұрған адамның арқасынан жәймен ғана қолмен желдің жеңіл самалындай етіп сипаймыз. Жел күшейді – енді алдындағы адамның арқасын қатты уқалай бастаймыз, кенет боран басталды – енді боран күшіндей екі қолмен айналдыра күштірек уқалаймыз. Содан кейін аяқ астыннан жәй ғана жаңбыр сіркірей бастады – енді қолымызбен жаңбырдың сіркіріндей жәймен ұрамыз. Бір кезде қатты жауын жауды: арқамызды саусақтардың ұшымен жоғары төмен сипалаймыз. Аяқ астынан бұршақ жауды: арқамызды саусақ басымен бұршақ жауғандай қаттырақ ұрамыз. Бір кезде бәрі басылды, күн жарқырап ашылып адамға күшті шуақ берді. Бәріміз демалып сергіп қалдық.
Ойлан тап:
Балалар қазір сендерге «Жақсы бала» деген сөз беріледі. Сол сөзге тез ойланып бірнеше мақал-мәтел айтамыз.
«Сөз ішінен бірнеше сөз ізде» ойыны
«Жақсы бала»
Сонымен балалар «Жақсы бала» деген сөйлемнен бірнеше мақал-мәтел айттық, бірнеше сөз таптық. Балалар осы «Жақсы бала» деген сөйлемнен сендер қандай ой түйдіңдер? Қандай қорытынды шығардыңдар?
«Жүректен-жүрекке»
Балалар бәріміз қосылып өлең жолдарымен бір-бірімізге әдемі күлкімізді сыйлап амандық тілеп қоштасайық.
Кел балалар күлейік
Күлкіменен түлейік!
Қабақ түйген не керек?
Көңілді боп жүрейік
Кел балалар күлейік
Күлкіменен түлейік
Күлкі көңіл ашады
Күліп өмір сүрейік.
